മാഷ്

മാഷ്
ഒരു മനുഷ്യന്‍
ഉരുണ്ട കല്ലുകള്‍ പോലെയാകുന്നത്
അനുഭവങ്ങളാല്‍ കോണും മൂലയും പോയി
അരികുകള്‍ മിനുസപ്പെടുംപോഴാണല്ലോ

അത്തരത്തില്‍ ഒരു ഉരുണ്ട കല്ലാണ്
കഷണ്ടിത്തലക്കാരന്‍ അപ്പുമാഷ് .
മാഷ് ചവയ്ക്കുന്നത്‌ വെറ്റേമാനും
തുപ്പുന്നത് കണക്കുമാണെന്നാണ്പറയുക.
ഓര്‍ത്താല്‍ മാഷിനെപ്പോലെ ചട്ടമ്പികള്‍
ഇല്ലായിരുന്നു നമ്മുടെ നാട്ടില്‍

കൊന്നിട്ടില്ലെന്നേയുള്ളൂ
കവലയിലിട്ടു
ചവിട്ടിത്തേച്ചിട്ടുണ്ടു പലരെ
കെട്ടിയില്ലെന്നെയുള്ളൂ മൂന്നുണ്ട് മക്കള്‍.

ജയിലില്‍ കിടന്നിട്ടില്ലെന്നെയുള്ളൂ
തള്ളിപ്പോയതാണ് കേസുകള്‍

പാതി രത്രിയില്‍ ഒറ്റയ്ക്ക്
സെമിത്തേരിയില്‍ വാശിയ്ക്ക് പോയിട്ടുണ്ട്.
കൊങ്ങയ്ക്ക് കുത്തിപ്പിടിച്ച്
കുരുത്തംകെട്ട പിള്ളേരെ
പള്ളിക്കൂടത്തിനു പുറത്ത്എറിഞ്ഞിട്ടുണ്ട്

ഗീതയും ഖുറാനും ബൈബിളും
വായിച്ചാണ് മാഷിന്റെ
പത്തിതാണതെന്ന്
പറയാറുണ്ട് മില്ലുകാരന്‍ ശങ്കരന്‍.

ഈ കല്‍ക്കണ്ടം തിന്നണം എന്നാണ്
ഓരോ പുസ്തകവും നീട്ടിക്കൊണ്ടു
പറയാറ്.

സമാധാനത്തിന്റെ വെള്ളക്കൊടി പോലത്തെ
നരച്ച മുടിയിഴകള്‍ മാടി
കറുത്ത കണ്ണടയ്ക്കുള്ളിലെ വിടര്‍ന്ന കണ്ണുകള്‍
ചുളിച്ചു
ഇതു പോലെ എല്ലാം വന്നു ചേരുമെന്ന്
ഊന്നു വടി കാണിച്ച്
മാഷ് പറഞ്ഞതു ഓര്‍മയില്ലേ...

ഇപ്പോഴും മനസ്സിലാകുന്നില്ല
മാഷിന് വന്‍തുകയുടെ ഇന്‍ഷുറന്‍സ്
എന്തിനായിരുന്നെന്ന്
അത് കൊണ്ടല്ലേ തല തല്ലിപ്പൊട്ടിച്ചു
മാഷിനെ മാഷ് തന്നെ കൊന്നത്!!!