പാലം

പിഴുതു വീണ ഒരു തെങ്ങാണ്
ഞങ്ങള്‍ക്ക് തോടിനു കുറുകെയുള്ള പാലം.

തകര്‍ന്നു വീഴുമ്പോള്‍
രണ്ടു കരകള്‍ നിശ്ച്ചലമാകുമെന്നു
അവകാശപ്പെടാനാവാത്ത എളിയ പാലം.
ഒറ്റയ്ക്കാവുന്നവര്‍ സുരക്ഷിതരാണെന്ന പക്ഷമുള്ള
ആ ഒറ്റത്തടി വൃക്ഷം
ഉടനീളം ജാഗ്രതയുള്ള യാത്ര ആവശ്യപ്പെടുന്നുണ്ട്.
നിവര്‍ന്നു നിന്ന കാലത്തും
ഇന്നേവരെ ഈ കിടപ്പിലും
ആരെയും വീഴ്ത്തിയിട്ടില്ല.
എല്ലാവര്‍ക്കും എല്ലാവരോടുമുള്ള
പിടുത്തം നഷ്ടപ്പെടുന്നുവെന്നതാണ്
പറയുവാനുള്ള ഏക പോരായ്മ
അതു വഴി നടക്കുമ്പോള്‍.
അവകാശ വാദങ്ങള്‍ ഇല്ലാത്തതു കൊണ്ടാവണം
രാംകോ സിമെന്റിന്റെ ഉറപ്പില്ലാഞ്ഞിട്ടും
അതു വഴി എപ്പോഴും ആളുകള്‍ ഉള്ളത്.
എന്നിട്ടും ഞങ്ങളുടെ പഞ്ചായത്തിന്റെ
വില്ലേജ് ഓഫീസിലിരിയ്ക്കുന്ന സ്കെച്ചില്‍
പ്രസ്തുത പാലം അടയാളം ചെയ്തിട്ടില്ല.